السلام عليكم ورحمة الله وبركاته ..
من هنا ومن موقعي هذا من المقهى وخلف الكمبيوتر وبجوار الباب حق المقهى ارحب بكم للوصف والتعليق على مباراة اليوم <---- محمد البكر متلطم



وبمناسبة بداية بطولة كاس العالم اللي بيشارك فيها منتخبنا الاطخم فأنني أعلن ومن خلال هذا الموضوع اعلان التحدي لجميع المتخبات اللي بتشارك بهالبطولة لان الزكرت لاعبين المنتخب ناوين يفتحون صفحة جديدة مع كأس العالم وقايلين بناخذ البطوله

واقول لكل شخص تونسي واوركراني واسباني بهذا المنتدى /
سوف نهزمكم ونجيب اجلكم <---- مهوب عاقل عبدالرحمن بن سعود
وااقول لااعضاء المنتدى /

لايفوتكم تشجيع المنتخب اللي هم نواة المستقبل للكرة السعوديه مثل ( محمد الدعيع وسامي باجابر وخالد عزيز اللحجي ونوره ومطوع منتخبنا الخثران ولاعبنا الانيق سعد الحارثي ومحبوب البنات ياسر القحطاني ) وعلى طاري الدعيع اقول تراي بديت اشك ان نجمنا محمد الدعيع بدأ الغرور في نفس ابو الشباب وصار يتوهم ان اندية اوروبا تبي تتعاقد معه

يابرازيلي لااشوف وجهك بهالمنتدى لين تنتهي البطوله لاني منتخبنا الاطخم بجيب اللقب بيجبه عازمين الله لايعوقهم بشر
يعني شوفوا عندكم مصايف بالصومال تراها حلوة روحوا لمقديشو والا بيروت واذا كنتوا بالسعوديه اذا جت مباريات منتخبنا روحوا للحكير دريم ترى يمدحونها ماابي يرتفع ضغطكم وانتم تشاهدون نجوم منتخبنا يجندلون الفرق واحد تلو الآخر وترون فريقكم ينصك بالثمانيات <---- نسينا ماكلينا





وفي الختام تذكروا ماقاله الشاعر الجاهلي / سامي اجابر:
لاخير في دنيا اذا ماسرتك *** ولاخير بأرض(ن) مافيها شراب العائلة


ترى هالموضوع طلع كذا مسكه غلط علشان كذا اعذروني بس حبيت اسوي بروفة علشان اعلمكم بثقافتي الرياضية قبل مااتكي هنا طوال بطولة كاس العالم <---- لا واضح انك مثقف يالافغاني

السلام عليكم ورحمة الله وبركاته ..
من هنا ومن خلف الشاشه ا الواقعه في  بيتنا صاحب  اقدم لكم تحياتي وتحيات العيال اللي جنبي وهم /
صقيقي هاني ( صورة قلب مقطوع من النص ومكتوب عليه ياحياة الشقا )
واخوي (علي كاس )وهو المسلم الوحيد الذي لايستطيع ان يسجد على أطرافه السبعه بالصلااة لان خشمه يخلي وجهه معلق مايمدي جبهته تلمس الارض

ولمعلوميتكم فقد تمت التجهيزات لاستقبال هذا الحدث العظيم منذو صلاة الظهر لان العيال اقلقونا الا ينقلون التلفزيون داخل البيت علشان يطفون اللمبات ويحسون انهم في سينما <-- طموح عالي

وبعد ماانتهينا من التجهيزات اتصلت على ( هاني ) وقلت له / تعال وعطيته بوسه بالتلفون بس شكل احد جنبه لانه يقول / وش في صوتك لاتكون مزكوم


المهم سنترنا في الغرفه تقريبا من الساعه خمس عصرا وتابعنا حفل الافتتاح وكان الوضع عادي لين جابوا صورة ( كلوديا شيفر ) وهي جنب بيليه لان الغرفه صارت انواع التأوهات اللي يقول / ليتني بيليه
واللي يقول / كلوديا تكفين عطيني رقم بطاقة احوالك علشان اطلع نتيجتك بالثانوية بدري

____

وبعد كذا بدأت مباراة / المانيا * كوستاريكا

سنترو الالمان اول شيء ومدري ليه من اول ماشفتهم يدقون السنتره وانا ينغزني صدري بقوة لاني مااحبهم مدري ليه هالشعور صار يخمني اذا شفت المانيا تلعب وخصوصا بعد عام الفين واثنين هم صح يعرفون يسوون مرسيدسات وسيارات كشخه بس ولو مااحبهم ولااواطنهم في عيشة الله يمكن لانهم يقربون لهتلر <--- اجل يقربون لهتلر الا قل من قهرك عقب الثمانيه


المهم بدأت المباراة سريعه حتى من زود سرعتها كلمت العيال اقول لهم / بالله خففوا السرعه ترى منيب رايق تنتهي المباراه قبل صلاة العشاء


ماامدى اخوي وصقيقي وفلذة كبدي / علي كاس: يستوي في جلسته على الكنب الا وابو الشباب الالماني رقم سطعش / (فليب لام ) .. الا وهو مجربع له اثنين من لاعبي كوستاريكا ورقص بهم قدام المرمى من جهة اليمين ويقبع ام الكوره وتتعلق في زاوية المرمى الكوستاريكي هدف اول للالمان والدقيقه تو ماوصلت لرقم تسعه ..

لعنبوهم هالالمان سريعين في كل شيء اخاف حتى سريعين في زواجهم اول مايتزوج الواحد منهم يجلس اسبوعين الا حرمته جايب له ولد ويتفقون هو وحرمه على تسمية المولود ( هيثم ) <--- هذي آخرة اللي يقرأ جريدة الرياض واجد


بعد الهدف توقع الجميع ان ذكريات ثمانية المانيا فينا بتتكرر اليوم على جرابيع كوستاريكا ولكن مثل ماقال الشاعر الجاهلي / محمد العنبر
اللي مايعرف للصقر ... يأخذ دوره في معهد نيوهورايزن للغات


لان عيال كوستا كانو مقضمين قبل المباراه وحالفين الا يسوون شي بالمباراه وخاصه لاعبهم رقم تسعه ( وانشوب ) اللي اثبت بمالايدع مجال للشك ان البثاره متأصله في التكارنه في جميع ارجاء العالم مهوب عندنا بس ..

حيث قام البثر ( وانشوب ) بكسر مصيدة التسلل اللي طبقوها زلايب المانيا وانفرد بالحارس ومحط والدينها على يمين حارس المانيا اللي صار شكله في ذيك اللقطه مثل المرسيدس اذا صار فيها خراب في الفحمات <--- يرحم والدينك لاعاد تشبه لاافقع وجهك

بعد ماصارت النتيجة تعادل حسو المانيا بأنهم بحلو بعمرهم وقامو يضبطون هجمات من جهة اليمين ورا بعض لين حس ظهير كوستاريكا الايسر بالدوخه شوي وعلم مدربه انه صار يحس بالدوخه وماامداه يقول هالكلمة الا والزغاريد تنهال من دكة احتياط كوستاريكا لان مدربهم قال لهم / خوينا حامل


بعد السالفه اللي فوق باربع دقايق وصلت كوره على الطرف جنب الركني عند شفاينشتايجر وارسلها لبعد قلبي وملهمي الفكري ( شنايدر ) اللي سحب في طريقه لاعبين اثنين من فئة تكرنبا وقبع الكوره بمشط القدم <--- مهوب عاقل الشتالي اجل مشط القدم
المهم بعد ماشاتها صارت الكوره آخذه لفه قدام مرمى كوستاريكا ومالقت الا الاطخم ( كلوزا ) اللي استقبلها بأريحية وخكرنة عيال التحليه وحطها بالباب الفاضي كهدف الماني ثاني ..


بعد هالهدف بردت المباراه حتى اننا بالغرفه صرنا نرسل لبعض مقاطع بلوتوث ولو تبون انزل نوعية من هالمقاطع هنا ماعندي مانع بس خايف انهم يحجبون اسبيسي ثم نقعد بها

وانتهى الشوط الاول بتقدم المانيا بهدفين مقابل هدف لكوستاريكا ..


*** الشوط الثاني ****

بدأ بداية بارده نفس الدقايق اللي صارت في اخر الشوط الاول ورجعنا لحالتنا السابقه من ارسال مقاطع لبعضنا بس لايسعني في هذه اللحظات الا ان اقول للي ماعمره شاف مقطع بلوتوث هيفا وهبي ترا فاته نص عمره


وعندما وصلت الدقيقه الى رقم اثنين وستين من عمر المباراه كان للاعب الفلته ( قليب لام ) كلام ثاني لانه مسك له خط من جهة اليسار رايح جاي كنه حقين تكاسي ( جده _ مكة ) ترانزيت

المهم في احدى هالطلعات مشى طويل العمر الالماني وعرض الكوره ويوم كانت الكوره فوق بالهوا الا يجيك واحد كوستاريكي مطفي النور ويلمخها بجبهته اللي تلمع وتنزل الكوره على راس ( كلوزا ) ويعطيها ذيك الصكه براسه اللي ذكرتني بحفل زواج ولد عمي لاني ذاك اليوم صكيت براسي بجدار القصر بعد ماكنت اطرد ورا جراده قاهرتني
وبعد ذيك الصكه وتلمخ الكوره ببطن حارس كوستاريكا وترجع لكلوزا اللي شاتها بالمرمى كهدف الماني ثالث ..


بعد هذا الهدف بعشر دقايق قاموا عيال كوستا بهجمه ملعونة والدين ووصلوا الى خط ثمانطعش المانيا ونقزوا الكره من ورا دفاع المانيا اللي كانوا مسوين مصيدة تسلل وذكروني بدفاع النصر اللي كل ماسوا مصيدة تسلل أنلزخنا بهدف وفي هذه الاثناء امسي على خالد قهوجي بالخير
ووصلت الكره للبثر خوينا ( وانشوب ) اللي حط الكوره من فوق الحارس الالماني كهدف كوستاريكي ثاني ..


واستمر اللعب بعد كذا في نص الملعب وكنا نتهيض مع كل هجمه لكوستاريكا نبيهم يجيبون تعادل لكن ربنا مااراد ..


ويوم وصلت المباراه للدقيقه سبعه وثمانين شات اللاعب الالماني ( فرينجز ) كرة من بعيد مسكت خطها بشكل مجنون لين تعلقت بالمرمى كهدف رابع الماني ..

ومن زود اعجابي بهالهدف جلست اصفق لين انتهت المباراه


وهكذا انتهت مباراة الافتتاح بين المانيا وكوستاريكا بفوز المنتخب الالماني باربعة اهداف مقابل هدفين لكوستاريكا ..


بعد المباراة ودعت ( هاني ) اللي راح لبيتهم علشان يشتري لهم خبز بريالين لان عشاهم ايدام وانا جيت اكتب لكم هالتحليل


كتبه لكم / المصدر الأول..
الساعه / 11 ونص
المكان / ورا حارة غليل ا ..